Fir d Euro 08 haan ich welle
my Balggon zur Verfiegig stelle.
Doch d Uefa will, statt sich z bedangge
derfiir no 100’000 Frangge.

S Tante Trudi muess in der Garage woone
will d Stuben isch jetzt de Fän ihri Zoone.

Loose:

Syts d Migros git, bin ych derbyy.
Kauff us Prinzip nur deerte n yy.
Jetzt kaufft d Migros dr Denner uff,
drum frai my uff my eerschte Suff

Vor em Konsum seits Tante Trudi zum Rosi:
Du dä klaini Sarkosi,
ka eigetlig froh si,
Het wider ä Bruuni ... und e Grossi.

Loose:

Als scheene Maa weiss ych genau,
im Raadarkaschte sitzt e Frau.
Wenn yych schnäll gnueg tue duure faare,
denn blitzt die frintlig in my Kaare

S Tante Trudi behauptet in däne Kischte
sitze mängisch Polizischte

Loose:

Was het der Fernand Gerspach dänggt
und zünftig mool in d Kasse glänggt?
Verloo vo allne guete Gaischter,
blybt äär nur der Verseggelmaischter.

S Tante Trudi tät zum stähle
ganz en anderi Kasse wähle,
eini wos keine tuet hindere strähle,
wenn zwanzig Milliarde – ungrad – fähle.

Loose:

Der Jäger schlitzt den Wolf entzwei
Rotkäppchen ist nun wieder frei.
So deent in Zuekunft, wie z` erwaarte
d Määrlischtund im Kindergaarte

Tante Trudi weiss auch in Märlein
Knut und Flocke, die zwei Bärlein
sind ein Pärlein.

Loose:

D Roche baut jetzt e Duurm us Glaas,
e Superhelix Form syg daas.
Doch luegsch genau fyylsch di betrooge,
s isch s nei Casino in d Heechi zooge

Ziehnt none bitzli, seits Trudi und lacht
Bis es tschätteret und zämme kracht.

Loose:

Der Donnschtigsjass, das isch e Hit,
doch sälber spiile kann ych nit.
Drum faar ich jetzt als Jassbanaus
nach Ryynach mit dem Elfer raus.

Mir spiile us! riefts Tante Trudi
und zieht ä Trumpf us ihrem ... Ärmel.

Loose:

Der Blocher sait zem liebe Gott:
Dyy Allmacht isch daas won ich wott.
Dr liebi Gott seit druff zem Soon:
Denn gang yych , in d Oppositioon.

S Tante Trudi isch au in dr Opposition,
lost Schacher Sepp statt Rolling Stone.

(Schacher Sepp, instrumental)

s Tante Trudi sait:
Das gfallt em Marcel Ospel, jedi Wett
unserem UBS-Verschacher Sepp.

Loose: